Улууска Аҕам саастаахтарга ытыктабыл сылынан уонна нэһилиэккэ ыытылла турар аҕам саастаахтар декадаларын чэрчитинэн бүгүн, алтынньы 11 күнүгэр,Уйбаан Нуолур аатынан модельнай бибилэтиэкэҕэ бибилэтиэкэ сүрүн специалиһэ Мария Чагдинская ким баҕалаахха «Шерстяная живопись» диэн маастар кылаас ыытта. Бу уруһуй ураты хайысхатын устуоруйатын кылгастык билиһиннэрдэххэ, аан бастаан ХХ үйэҕэ Германияҕа немец бөлүһүөгэ Рудольф Штайнер саҕалаабыт эбит. Штайнер, араас өҥнөөх түү хартыынаны уруһуйдуурга матырыйаал буолуон сөбүн таба көрөн, ити хайысханы саҕалаабыт. Бу үлэнэн дьарыктанар киһи уоскуйар, дуоһуйууну ылар, айар дьоҕура арыллар диэн бэлиэтээбит. Бүгүҥҥү маастар кылааска кэлэн үөрэммит кэрэ аҥардар Мария Витальевна сүбэтинэн сүрдээх үчүгэй үлэлэри оҥорон — бэйэлэрэ улаханнык астынан, дуоһуйан, махтанан бардылар. Инникитин элбэхтик маастар кылааска үөрэнэн үйэлээх үлэлэри — Улуу Кыайыы 80, С.А.Зверев -Кыыл уола төрүөбүтэ 125 сылыгар кини айымньыларыгар паннолары оҥорор баҕалаахтарын эттилэр. Онон бибилэтиэкэҕэ кэлэн дьарыктаныҥ, иллэҥ кэмҥитин туһалаахтык атаарыҥ.
Күндү ааҕааччыларбыт, бу декаданан, салгыы «Элгээйи эбээлэрэ, эһээлэрэ кэпсииллэр» остуоруйа ааҕыытын , «Читать-это модно!» фотозонаҕа таптаан, сөбүлээн аахпыт кинигэҕитин кытта хаартыскаҕа түһүү акцияларыгар көхтөөх кыттыыны ыларгытыгар ыҥырабыт!
