Алтынньы ый 4 күнүгэр, Уйбаан Нуолур аатынан Элгээйи олохтоох «Оһуор» Култуура киинэ уонна бибилэтиэкэ тэрийиилэринэн Сунтаар улууһун,Элгээйи,Күүкэй нэһилиэктэрин бочуоттаах олохтооҕо, СӨ тыа хаһаайыстыбатын үтүөлээх үлэһитэ,Элгээйи эт-үүт кэмбинээтин дириэктэрэ Прокопий Степанович Акимов тыа хаһаайыстыбатын салайааччытынан эҥкилэ суох үлэлээбитэ 45, Элгээйи эт-үүт кэмбинээтэ 30 сылларын көрсө олоҕун уонна айымньылаах үлэтин туһунан «Олоҕум үлэнэн хардыылаабыт суола» диэн баай ис хоһоонноох, уус уран тыллаах-өстөөх саҥа дьоһун кинигэтэ бар дьоҥҥо сүрэхтэннэ. Бу истиҥ иһирэх тэрээһиҥҥэ Прокопий Степанович дьиэ кэргэнэ, аймахтара, чугас доҕотторо, оскуолаҕа бииргэ үөрэммит оҕолоро, үлэлиир коллектива, улуустааҕы тыа хаһаайыстыбатын управленията,Элгээйи,Күүкэй олохтоох дьаһалталара , П.Х.Староватов аатынан орто оскуола, ону тэҥэ куйаар нөҥүө Дьокуускай куораттан кинигэ тула кэпсэтиигэ кыттан, санааларын үллэстэн, итии истиҥ эҕэрдэлэри анаатылар. Прокопий Степанович аҕата төрөөбүт-үөскээбит Күүкэйигэр норуокка үлэтинэн-хамнаһынан биллибит, хорсун саллаат Степан Васильевич Акимов -Ыстахаанабыс Ыстаппаан сырдык аатын үйэтитэн сылын аайы сүүрүү күрэһин спонсордаан,дойдутугар бюст туруоран, аҕатын туһунан кинигэ таһааран үгүс дьоҥҥо холобур буоларын туоһулаан Күүкэй олохтоох дьаһалтата «Күүкэй нэһилиэгин сайдыытыгар кылаатын иһин» бэлиэни үөрүүлээх быһыыга -майгыга туттардылар. Кинигэни СӨ култууратын туйгуна, СӨ Суруналыыстыкаҕа судаарыстыбаннай бириэмийэ лауреата, Сунтаар улууһун, Кутана нэһилиэгин бочуоттаах олохтооҕо Милан Афанасьевич Афанасьев редактордаан таһаарда. Саҥаны -бастыҥы олоххо киллэрэртэн салгыбат, хаалан сытар отделенияны өрө тардыбыт, аар саарга аатырбыт Ленин уордьаннаах Элгээйи сопхуос көрдөрүүлэрин чыпчаал үрдүккэ таһаарсыбыт, Элгээйитээҕи эт-үүт кэмбинээтин туруулаһан туран отутус сылын сатабыллаахтык салайан олорор Прокопий Степанович кыайыы-хотуу үктэллээх олоҕун, айымньылаах үлэтин сэһэргиир кинигэттэн ааҕааччы кинини дириҥ билиилээх лиичинэс, сатабыллаах салайааччы, тапталлаах кэргэн, холобур буолар аҕа, чугас эрэллээх доҕор, меценат, патриот быһыытынан арыйыаҕа. Прокопий Степанович үлэтин-хамнаһын, иитиллибит эйгэтин туһунан кинигэ бэйэтэ иитэр -үөрэтэр хабааннаах олох энциклопедията буолан ааҕааччы киэҥ сэҥээриитин ыларыгар саарбахтаабаппыт. Күндү ааҕааччыларбыт кинигэни олохтоох бибилэтиэкэттэн уларсан ааҕыҥ, билсиҥ, туһаныҥ диэн ыҥырабыт!
