Сэтинньи 22 күнүгэр С. А. Зверев аатынан фольклор түмэлэ уонна Уйбаан Нуолур аатынан модельнай бибилэтиэкэ үлэһиттэрэ Саха Өрөспүүбүлүкэтигэр «Сэтинньи 25 күнэ — Олоҥхо күнүн» чэрчитинэн ыччат дьон олоҥхо курдук улуу айымньыны билэ-көрө, киэн тутта улааталларыгар сыаллаах П.Х.Староватов аатынан Элгээйи орто оскуолатын 10″а», 10″б» кылааһын үөрэнээччилэригэр «Уруйдан,Улуу Олоҥхо!» диэн тематическэй уруок ыыттылар.
Сүрүн бибилэтиэкэр Татьяна Семенова олоҥхо күнэ хайдах төрүттэмитин, суолтатын, ис хоһоонун билиһиннэрииттэн саҕалаата. Түмэл үлэһитэ Олимпиада Захарова биир дойдулаахпыт, суруйааччы, поэт, драматург,тылбаасчыт Иван Гаврильевич Алексеев «Хатан Эрбийэ бухатыыр» олоҥхотун туһунан билиһиннэрдэ. Бу олоҥхону 1991 сыллаахха «Мелодия» грампластинка фирмата таһаарбыт пластинкаларын хомуурунньугуттан биирдэстэрин, Саха АССР үтүөлээх артыыһа Афанасий Федоров толоруутугар быһа тардыылары урукку проигрывательга холбоон иһитиннэрдэ.
Салҕыы түмэл салайааччыта Ксения Семенова аар тайҕа ырыаһыта С. А. Зверев-Кыыл Уолун «Айхал эйиэхэ, Аар-Тайҕа!» олоҥхо-тойугун туһунан презентация көрдөрдө уонна олоҥхоҕо суруллубут тылларын сөпкө дьүөрэлиир соруктаах тургутук оонньуу ыытта. Оҕолор хас биирдиилэрэ бу олоҥхо-тойугу ааҕан Кыыл Уолун айымньытын тылын сүмэтин истэригэр иҥэринэн, билиилэрин чиҥник хаҥаттылар.
Тэрээһин түмүктүүр чааһыгар бибилэтиэкэ үлэһиттэрэ бэлэмнээбит «Олоҥхо оонньууларыгар» хамаанданан ,«Толбоннурар уһун суһуоҕу өрүү», «Саха иһитин ойуутун таҥыы», «Ситиинэн тигии», «Күөрчэх ытыйыы», «Сыал ытыы», «Тылы таһаарыы», «Бухатыыр атын оҥоруу», «Айыы кыыһын абааһы уолуттан быыһааһын» диэн тоҕус түһүмэхтээх оонньууга күөн көрүстүлэр. Күрэс түмүгүнэн «Хотой» хамаанда 1 миэстэ, «Олоҥхо» хамаанда 2 миэстэ буоллулар.
Оҕолор бары олус көхтөөхтүк кыттан, олоҥхо туһунан олус элбэҕи билэн-көрөн, билиилэрин хаҥатан, үөрэн-көтөн тарҕастылар.
Маннык тэрээһиннэр үүнэр көлүөнэ эдэр дьону Сахабыт норуотун тылынан уус уран айыньыларыттан саамай бөдөҥ, чыпчаал айымныта — Олоҥхобутун таптыырга, кэрэхсииргэ олук буолар.
Киһи олоҥхону аахтаҕына
кэрэтик сананарга, олоҥхо тылын өйдөөтөҕүнэ, мындырдаан толкуйдуурга, ис хоһоонун
биллэҕинэ, сөптөөхтүк дьаһанан олох олорорго үөрэнэр.
Саха омук, өбүгэ саҕаттан, өйүттэн-сүрэҕиттэн сүтэрбэккэ
yohуттан туһэрбэккэ илдьэ кэлбит
олонхото сайда-чэчирии туруохтун!