Сэтинньи 15 күнүгэр, Элгээйи нэһилиэгэр “Байанай бэлэҕэ» дьиэ-кэргэн күрэһэ буолан ааста.
Күрэс тэрийээччилэрэ: Сунтаар улууһун үөрэх управленията (сал. Васильев Б.Н.), Б.Н.Андреев аатынан Айылҕа түмэлин коллектива (сал. Иванова А.С.), Уйбаан Нуолур аатынан модельнай библиотека (сал. Семенова Т.А.), Элгээйи спортивнай саала (сал. Попов О.А.), «Оһуор» культуура киинэ (сал. Семенов В.Н.).
Күрэскэ эбээ, эһээ уонна сиэн буолан кытыннылар. Бастакы этабынан Айылҕа түмэлигэр олохтоох библиотека үлэһиттэрэ Семенова Т.А., Иванова Елизавета, Чагдинская Мария «Өркөн өй» күрэх ыыттылар. Иккис этабынан түмэл саалаларынан эбии үөрэх педагогтара Квест-оонньуу оонньоттулар: ол курдук, пазл таҥыыта (Яковлева О.М.), кыыллары таайааһын (Иванова Н.П.), тыллары өйдөөн хаалыы (Кириллина К.Г.), үүнээйи сиэмэлэрин таайыы (Иванова А.С.), экспонаттары булуу (Прокопьева С.Н.), көтөрдөр атахтарын таайыы (Герасимова С.М.).
Күрэспит түмүктүүр чааһынан Элгээйи спортивнай саалыгар күрэстэһээччилэрбит курумуу кэтэн эстафеталаан (эпп. Яковлева О.М.), сиэннэр балык хаптаран, онтон эһээлэр уу бэлэмнээн, эбээлэр балык хатырыктаан, үөстээн (эпп. Прокопьева С.Н.) күрэстэстилэр. Салгыы сахалыы ох саанан сыал ытыытыгар кустары, куобахтары табан (эпп. Герасимова С.М.), онтон маамыкта — таба муоһугар обруч киллэрэн (эпп. Гуляев Г.Г., Татаринов Т.Д.) уонна түмүктүүр этапка оскуома саайыытынан күрэспит түмүктэннэ (эпп. Иванов Е.И., Егоров Н.Е.). Күрэспит аһыллыытыгар коллегабыт Гуляев Геннадий алгыстаах тойугунан, «Оһуор» культуура үлэһиттэрэ Айсена, Михаил Федоровтар ылбаҕай ырыаларынан, Евдокия Захарова кылыһахтаах алгыһынан эҕэрдэлээтилэр. Үөрүүлээх чааска нэһилиэкпит Аҕа баһылыгын эбээһинэһин толорооччу Самойлов Аркадий Геннадьевич коллегабытыгар Татаринов Терентий Денисовичка «Элгээйи нэһилиэгин Бочуоттаах олохтооҕо» знагы туттарда.
Күрэспитигэр дьүүллүүр сүбэҕэ Иванова А.С., Иванова Н.П., Кириллина К.Г. суоттааһынынан үс хамаанда үһүөн тэҥ очкону ыланнар, хаачыстыба ааҕыытын түмүгүнэн маннык түмүктэр таҕыстылар. Ол курдук, маҥнайгы миэстэни Ульяна Васильевна, Аркадий Семенович уонна Максим Игнатьевтар дьиэ кэргэн кыайыылаах аатын ыллылар уонна Айылҕа түмэлин мецената, Байанайдаах булчут Тимофеев Афанасий Егорович-Байанайдаах Бааhынай оҕолоро туруорбут 20.000 солк. уу харчынан наҕараадаланнылар.
Иккис миэстэни Галина Григорьевна, Владимир Ильич уонна Айуран Поротовтар-Ивановтар дьиэ-кэргэн ыллылар уонна быйылгы үбүлүөйдээх, 95 сааһын туолбут бары ытыктыыр киһибит, Дьокуускайга сатыы хамыы салайааччыта, Байанайдаах булчут Павлов Григорий Иннокентьевич оҕолоро, сиэннэрэ туруорбут 15.000 солк. уу харчынан анал бирииһинэн наҕараадаланнылар.
Үһүс миэстэни Виктория Васильевна, Андрей Семенович уонна Кристина Игнатьевтар дьиэ-кэргэн ыллылар уонна Айылҕа түмэлин мецената, быйыл төрөөбүтэ 95 сылынан, аатырбыт хирург-быраас Данилов Петр Михайлович оҕолоро 10.000 солк. уу харчынан туттардылар.
Ону таһынан анал бириистэри Уйбаан Нуолур аатынан олохтоох библиотека, кадровай булчут, Айылҕа түмэлин мецената Иванов Трофим Васильевич сиэннэрэ, Анна, Аркадий Чяриннар дьиэ-кэргэн, Павлов Евгений Юрьевич, Раиса, Анатолий Ивановтар дьиэ-кэргэттэрэ туттартаатылар.
Күрэспит кыттааччыларыгар, спосонсордарбытыгар тэрийээччилэр ааттарыттан барҕа махталбытын тиэрдэбит. Куруутун Байанайгыт мичик гыннын, илии тутуурдаах, өттүк харалаах, чэгиэн туруктаах буолуҥ!
