Ахсынньы 20 күнүгэр, Уйбаан Нуолур аатынан модельнай бибилэтиэкэҕэ, үгэс буолбут, сылын аайы ыытыллар Тымныы  Моруос оҕонньор бирииһигэр нэһилиэккэ дуобат күрэһэ 39 төгүлүн ыытылынна. Күрэһи Элгээйи спортсаалын дириэктэрэ Олег Попов уонна бу күрэс ааптара Прокопий Егоров көҕүлээн, салайан ыыттылар. Күрэскэ барыта 26 дуобатчыт биирдиилээн бастыыр иһин күөн көрүстүлэр. Сыл ахсын күрэскэ оҕолор кыттыылара элбээн иһэрэ,дуобакка интэриэс үрдээн иһэрэ үөрдэр. Бу оскуолаҕа оҕолорго дуобат куруһуога тэриллэн үлэлиирин үтүө өрүтэ буолар. Күрэс кыттыылаахтарын Олег Августинович,Прокопий Митрофанович уонна Тымныы Моруос оҕонньор эҕэрдэлээтилэр уонна СӨ култууратын туйгуна Евдокия Захарова алгыстаах тойугунан эҕэрдэлээтэ. Салгыы дуобатчыттар дуобат хонуутугар  күрэстэһэн ким күүстээҕин быһаардылар, ол курдук, улахан эрийсиилээх оонньуу кэнниттэн бастыҥнар, Кыайыылаахтар билиннилэр.  Быйылгы 39-с  төгүлүн ыытыллыбыт  Тымныы Моруос оҕонньор бирииһигэр дуобат күрэһигэр оҕолорго: Софонов Реас — 1 миэстэ, Михайлов Дуолан — 2 миэстэ, Андреева Диана -3 миэстэ, дьахталларга: Пахомова Вера — 1 миэстэ,Семенова Тамара -2 миэстэ, Ноговицина Надежда -3 миэстэ, эр дьоннорго: Немопнящий Ньургун — 1 миэстэ, Иванов Гаврил — 2 миэстэ, Уаров Владимир — 3 миэстэ буоллулар уонна мэдээллэринэн, олохтоох дьаһалта туруорбут сыаналаах  бириистэринэн наҕараадаланнылар. Дуобат -өй, успуорт күрэһэ нэһилиэкпитигэр тэнийэригэр, сайдарыгар бэйэлэрин кылааттарын киллэрэ сылдьар дьоммутугар махтанан туран бары Кыайыылаахтары эҕэрдэлиибит, кыттыбыт бары дуобатчыттарга элбэх эрчиллиилэри, ситиһиилэри, кыайыылары баҕарабыт!

Уйбаан Нуолур аатынан модельнай бибилэтиэкэ кылаабынай бибилэтиэкэрэ Татьяна Семенова.