Бүгүн, сэтинньи 5 күнүгэр, С.А.Зверев-Кыыл Уолун аатынан фольклор түмэлэ,»Оһуор» КК,Уйбаан Нуолур аатынан модельнай бибилэтиэкэ нэһилиэк ыччаттарын, оскуола үрдүк кылааһын үөрэнээччилэрин түмэн Норуоттар Сомоҕолоһууларын күнүнэн уонна сэтинньи 13 күнүгэр СӨ бастакы Президенэ Михаил Николаев төрүөбүт күнүн көрсө «Ыччат -сомоҕо күүс» диэн тематическай тэрээһин тэрийдэ. Ыччаттарга Сомоҕолоһуу бырааһынньыгын историятын Ксенья Семенова сырдатта, салгыы ыччаттар алта хамаанданнан бу тиэмэҕэ өй күрэһэр кытыннылар уонна кэлэр сылга буолар улахан юбилейдарга бырайыак көмүскээтилэр. Хамаандалар Улуу Кыайыы 80 , Элгээйи орто оскуолата 150, С.А.Зверев-Кыыл Уола 125, Б.Н.Андреев 110 сылларыгар уонна оскуола оҕолоругар «Сахалыы ааҕыыны көҕүлээһин»,»Мин сынньалаҥым» диэн тиэмэлэри талан бырайыак суруйан көмүскээтилэр. Дьүүллүүр сүбэ хамаандалар бырайыактарын тиэмэлэрин төһө арыйбыттарын, ис хоһоонун,сонун идеяларын, төһө олоххо киириэн сөбүн сыаналаата, ол түмүгүнэн Айылҕа түмэлин хамаандата «С.А.Зверев-Кыыл Уола 125 сылыгар аналлаах» бырайыага -1 миэстэ, Элгээйи орто оскуолатын хамаандата «Б.Н.Андреев 105 сылыгар аналлаах» бырайыага — 2 миэстэ,Элгээйи орто оскуолатын үөрэнээччилэрин 1 хамаандата «Мин сынньалаҥым» бырайыага-3 миэстэ, Элгээйи орто оскуолатын үөрэнээччилэрин иккис хамаандата «Сахалыы ааҕыыны көҕүлээһин бырайыага -4 миэстэ буолан Хайҕал суругунан уонна олохтоох дьаһалта анал бириистэринэн наҕараадаланнылар. Бу курдук ыччат дьон нэһилиэк сайдыытыгар өрүү көхтөөхтүк кытта туруҥ, саҥа бырайыактары олоххо киллэрэн иһиҥ диэн тэрийээччилэр баҕа санаабытын тиэрдэбит.
