«Аман өс» күрэс түмүгэ

Олунньу 13 күнэ Саха сирин үрдүнэн төрүөбүт тыл уонна сурук-бичик күнэ. Бу күн «Оһуор» Култуура киинигэр Сунтаар улууһун номоҕун уонна сайдыытын, Элгээйи нэһилиэгэ төрүттэммитэ 255 сылларынан тэрилтэлэр, түмсүүлэр икки ардыларыгар үгэс буолбут “Аман өс” куолуһуттар күрэстэрэ ыытылынна. Тэрийээччилэр: «Оһуор» Култуура киинэ, Уйбаан Нуолур аатынан Элгээйи модельнай бибилэтиэкэтэ. Күрэскэ барыта 7 хамаанда кытынна.

Күрэс түөрт түһүмэҕинэн ыытылынна: I түһүмэх – бэйэни  билиһиннэрии, II түһүмэх – тиэмэни тардан ылан тыл этии, куолулааһын, III түһүмэх – Сунтаар улууһун, Элгээйи нэһилиэгин устуоруйатын билиигэ тургутук, IV түһүмэх – Элгээйи нэһилиэгин инники сайдыытын туһунан бэйэ көрүүтэ. Кыттааччы хамаандалар олус үчүгэйдик бэлэмнэнэн, сахалыы сайбаччы таҥнан, санааларын сааһылаан сайа этэн, тиэмэлэрин толору арыйдылар. Тэрээһини сүрүн бибилэтиэкэр Татьяна Семенова иилээн-саҕалаан ыытта.

Дьүүллүүр сүбэҕэ үлэлээтилэр: «Оһуор» Култуура киинин режиссера, Элгээйи нэһилиэгин бочуоттаах олохтооҕо Эльвира Николаева; олохтоох ааптар, нэһилиэк бочуоттаах олохтооҕо, “Ньургуһун”,”Кулуһун” литературнай түмсүүлэр чилиэннэрэ – Маргарита Заболоцкая; “Көмүс саас” түмсүүттэн эргиэн үлэтин  бэтэрээнэ Изабелла Петрова; тыа хаһаайыстыбатын специалиһа Матрена Самойлова; Элгээйи орто оскуолатын алын сүһүөх кылаас учуутала Виктория Федотова.

Дьүүллүүр сүбэ быһаарыытынан «Кылаан кыайыылаах» анал ааты ылла «Төлөн» хамаанда (Элгээйи орто оскуолата), «Итэҕэтиилээх тыл» анал аат — «Утум» хамаанда («Көмүс саас» түмсүү), «Кэскиллээх тыл»  анал аат — «Кэнчээри» хамаанда («Ёлочка» оҕо уһуйаана), «Алгыстаах тыл» анал аат — «Оһуор» хамаанда («Оһуор» Култуура киинэ), «Өркөн өй» анал аат — ЭРМЭК хамаандата, ”Хомоҕой тыл” анал аат — “Чэгиэн» хамаанда (участковай балыыһа), “Сайдам тыл” анал аат  – олохтоох дьаһалта хамаандата. Кыайыылаахтарга бириистэр, туоһу суруктар туттарылыннылар. Бары кыттааччыларга, дьүүллүүр сүбэҕэ, төрөөбүт тылын, саха норуотун устуоруйатын үөрэтиинэн, сырдатыынан дьарыгырар Егоров Прокопий Митрофановичка барҕа махтал тылларын этэбит.

“Кини миэнэ –

Барҕа баайым,

Өлбөт мэҥэм –

Мин дьолум…

Кустук өҥнөөх,

Кымыс сыттаах

Сахам аптаах саҥата». Семен Данилов.