Олунньу 11 күнүгэр, 2026 сыл — Арассыыйа норуоттарын сомоҕолоһууларын, Саха Өрөспүүбүлүкэтигэр — Култуура, Сунтаар улууһугар — Сайдыы уонна номох, Элгээйи нэһилиэгэ төрүттэммитэ 255 сылларынан, олунньу 13 күнэ — Төрүөбүт тыл, сурук — бичик күнүнэн «Төрүөбүт тылбыт — төлө туппат төрүт баайбыт» бырайыак чэрчитинэн, П.Х.Староватов аатынан Элгээйи орто оскуолатын 5 — 8 кылаас хамаандаларын икки ардыгар үгэскэ кубулуйбут «Өркөн өй» күрэһэ ыытылынна. Күрэс 6 түһүмэҕинэн барда, l түһүмэх — хамаанданы уустаан- ураннаан билиһиннэрии, ll түһүмэх — (дьиэтээҕи сорудах) суруйааччы А.А.Иванов-Күндэ, биир дойдулаахтарбыт ини — бии Аким, Ариан Кондратьевтар айымньыларыттан уус -уран толоруу, lll түһүмэх суруйааччы А.А.Иванов — Күндэ төрүөбүтэ 130 сылынан кини олоҕор, айымньыларыгар сыһыаннаах ыйытыктар, lV түһүмэх — биир дойдулаахтарбыт ини — бии Аким, Ариан Кондратьевтар үбүлүөйдээх сылларынан кинилэр олохторугар, айымньыларыгар сыһыаннаах ыйытыктар, V түһүмэх — Сунтаар улууһун, Элгээйи нэһилиэгин үбүлүөйдээх сылларынан ыйытыктар, VI түһүмэх — Арассыыйаҕа сомоҕолоһуу сылынан араас омук үгэстэригэр, култуураларыгар ыйытыктар. Хас кылаас аайы хамаандаҕа төрөппүт киирэн күрэскэ кыттыбыта олус үчүгэй буолла. Түмүккэ, 1 миэстэ — 7 кылаас » Күөрэгэйдэр» ( кылаас сал. Винокурова В.Н.), 2 миэстэ — 5б кылаас «Хотойдор» (кылаас сал.Чахова Т.Н.), 3 миэстэ — 8 кылаас «Күн оҕолоро» (кылаас сал. Охлопкова У.А.), «Кыайыыга дьулуурун иһин» анал ааты 6 кылаас ылан, оҕолор, төрөппүттэр билии бөҕө эбинэн үөрэн — көтөн тарҕастылар. Онтон күрэһи сылын аайы олус интэриэһинэйдик бэлэмнээн ыытар олохтоох, модельнай бибилэтиэкэ кэлэктиибигэр ( сал.Семенова Т.А.) барҕа махтал буолуохтун! Норуоппут муударай өс хоһоонугар мээнэҕэ эппэттэр «Киһи өйүнэн — көтөр өҥүнэн» диэн.
Людмила Павлова-саха тылын, литэрэтиирэтин үрдүкү категориялаах учуутала
