Элгээйигэ Саҥа Дьыллааҕы харыйа уота сандаарда.

Өрөспүүбүлүкэ үрдүнэн сылын аайы тэриллэн ыытыллар «Кыһын Саха сириттэн саҕаланар» бэстибээл чэрчитинэн Элгээйигэ ахсынньы 1 күнүгэр Саҥа Дьыллааҕы күөх харыйа уота сандаарар үөрүүлээх түгэнэ буолан ааста.

Халлаан тымныытыттан толлубакка, оҕо-аймах, төрөппүттэр “Оһуор” Култуура киинигэр муһуннулар. Кэрэхсэбиллээх концерт, ойуулук көрөн, уруһуй күрэһин түмүгүн истэн, СӨ култууратын туйгуна Анастасия Михайлова “Аргыс буолбут Дьөһөгөйүм оҕото” кэллиэксийэ-быыстапкатын сэргээн, кэрэ кэпсээнин истэн, оонньоон-көрүлээн оҕолор үөрүүлэрэ үксээтэ.

Чысхаан оҕонньор сиэнэ кыыс Хаарчааналыын эҕэрдэ эгэлгэтин эттилэр, кэрэчээн харыйа уотун уматтылар.

Кэлэр 2026 сыл сырдык, дьоллоох-соргулаах буоллун, ил-эйэ сатыылаатын!