Бүгүн, сэтинньи 13 күнэ — Инновация күнэ. Бу күн Ытык киһибит, Аан Дархаммыт,норуот тапталлаах Бастакы Президенэ Михаил Ефимович Николаев  аатын кытта ыкса сибээстээх.Бу — кини төрүөбүт күнэ. Сүдү күҥҥэ анаан Уйбаан Нуолур аатынан модельнай бибилэтиэкэҕэ «Саха сиригэр аныгы үйэ реформатора » диэн Михаил Ефимович Николаев олоҕун уонна үлэтин сырдатар улахан кинигэ быыстапката туруорулунна. Ыччат дьон  Саха норуотун лидерин, национальнай геройбут Михаил Николаевынан , Сахабыт сирин сайдыытынан киэн тутта улааталларыгар сыаллаах Элгээйи  орто оскуолатын 10 кылааһын үөрэнээччилэригэр «Михаил Николаев — Бүтүн Эпоха» диэн тематическай уруок ыытылынна. Саха норуотун билиниитин-тапталын улахан үлэтинэн, бүтүн олоҕунан, бар дьонугар кыһамньытынан ылыан ылбыт Аҕа Баһылыкпыт туһунан ыччат дьоннуун санаа атастаһыыта, кэпсэтии буолла уонна Ил Дархан Айсен Николаев «Бастакы бэрэсидьиэн М.Е.Николаев аатын үйэтитии» ыйааҕын иитинэн дьоҥҥо-сэргэҕэ тахсыбыт «Путь  президента» диэн РФ искусствотын үтүөлээх диэйэтэлэ Никита Аржаков режиссердаан, Саха сирин норуодунай суруйааччыта Владимир Федоров сценарийынан тахсыбыт документальнай киинэни  көрдүлэр. Үйэлэр кирбиилэригэр дьиҥ чахчы  сахалар дьоллоругар Үөһээ Айыылартан ананан кэлбит курдук саҥа Саха сирин инники сайдыытын түстээбит, сахалар омук быһыытынан киэҥник биллэрбитигэр, бары өттүнэн тахсарбытыгар олугу уурбут, үйэлэргэ умнуллубат киһибит,духуобунай лидербит Михаил Ефимович Николаев аата үйэлэри уҥуордуу туруоҕа!