«Большой этнографический диктант» диэн Норуоттар икки ардыларынааҕы аахсыйа Арассыыйа үрдүнэн сэтинньи 3-7 күннэригэр онлайн пуорманан ыытылла тураллар. Сэтинньи 7 күнүгэр, Уйбаан Нуолур аатынан Элгээйи модельнай библиотеката бу улахан аахсыйаҕа кыттыста. Тэрээһин кыттыылаахтара дойду үрдүнэн олорор араас норуоттар тустарынан билиилэрин тургуттулар. Диктант кэмигэр 30 ыйытыктаах тиэһи толордулар: дойду олохтоохторугар барыларыгар уопсай 20 уонна регионнарга олорооччуларга 10 ураты ыйытыктар бааллар. Атын дойдуттан кыттааччыларга 30 уопсай федеральнай ыйытыктары биэрэллэр. «Биһиги сорукпут сыала – аахсыйа кэнниттэн Арассыыйа олохтоохторугар бэйэлэрин төрүттэрин, өбүгэлэрин үгэстэрин, аттыларыгар олорооччулар тустарынан үөрэтэр баҕа санааны үөскэтээһин. Тоҕо диэтэххэ билии – араас омуктар икки ардыларыгар хардарыта ытыктаһыы уонна сөбүлэһии төрдө», – диэбит омуктар дьыалаларыгар Федеральнай агентство баһылыга Игорь Баринов.
Диктант ыытыллар сылларын тухары аан дойду 200-тэн тахса сириттэн үс мөлүйүөнтэн тахса киһи кыттыбыт. Бу туһунан регион баһылыгын уонна бырабыыталыстыбатын пресс-сулууспата иһитиннэрдэ. Тэрээһиҥҥэ барыта 11 киһи кытынна. Кыайыылааҕынан Павлова Людмила, II миэстэ – Семенов Александр, III миэстэ – Пахомова Галина буоллулар.Аахсыйа бары кыттыылаахтарыгар кыттыбыттарын туоһулуур “Улахан этнографическай дьыктаан” сертификатын туттулар. Билиигэ-көрүүгэ тардыһар Элгээйибит нэһилиэгин олохтоохторо бүгүн санааҕытын ууран кэлэн бу улахан тэрээһиҥҥэ көхтөөхтүк кыттыбыккытыгар тэрийээччилэр ааттарыттан улахан махталбытын тиэрдэбит!
